Wet Paint

മകള്‍ക്ക് വേണ്ടി വരച്ച ചിത്രം!

2008-05-17T21:06:00.000-07:00

മ്യാവൂവും കൊക്കോയും

....

ഈയിടെയായി മകള്‍ എന്നും എന്റെയടുത്തു വരും ഒരു കുഞ്ഞു സ്ലേറ്റും പെന്‍സിലുമായി. പടം വരച്ചു കൊടുക്കണമെന്ന് പറഞ്ഞ്. അങ്ങനെ വര്‍ഷങ്ങള്‍ക്കു ശേഷം ഞാന്‍ പിന്നെയും വര തുടങ്ങി. അവള്‍ക്കു വേണ്ടി ചില പേപ്പര്‍ കൊളാഷുകളും ചെയ്തു കൊടുത്തു. അതിലൊരു ചിത്രമാണിത്. മറ്റു ബൂലോകസുഹൃത്തുക്കളുടെ കുഞ്ഞുങ്ങള്‍ക്കായി ഇവിടെ പോസ്റ്റുന്നു. :)

സാരിപുരാണം, രേഖാചിത്രങ്ങള്‍

2007-10-24T04:15:00.000-07:00

സാരിയെക്കുറിച്ച് കുറേയേറെ പോസ്റ്റുകള്‍ ഈയിടെ കാണാനിടയായി. എന്റെ വകയുമിരിക്കട്ടെ ഒന്ന്. സമര്‍പ്പണം ബൂലോക വനിതാവേദിക്ക്!!

സാരി-തുന്നലുകളൊന്നുമില്ലാത്ത ഒരു നീളന്‍ തുണി. എത്ര ലളിതം, പക്ഷേ, ഏറ്റവും കൌതുകകരമായ വസ്തുത അത് ധരിക്കുന്ന രീതിയിലുള്ള വൈവിദ്യം തന്നെ. ഭാരതത്തില്‍ ഓരൊ സംസ്ഥാനത്തും, ഓരോ മതവിഭാഗത്തിനും, ഓരൊ ആഘോഷങ്ങള്‍ക്കും,എല്ലാം സവിശേഷമായ രീതിയുണ്ട് സാരിയുടെ കാര്യത്തില്‍. പഠോള,ബാന്ധ്നി,പൈത്ത്നി,തങ്കൈല്‍,കാഞ്ചീപുരം,ബാലുച്ചേരി,ബാലരാമപുരം തുടങ്ങി വൈവിദ്യമാര്‍ന്ന സാരികളെക്കുറിച്ചും അതിന്റെ ഡിസൈന്‍,നെയ്ത്,ചിത്രത്തുന്നലുകള്‍,പ്രിന്റിങ് എന്നിവയെക്കുറിച്ചും മറ്റും വിശദമായി പിന്നീടൊരിക്കല്‍ എഴുതാം. വിവിധ ഭാഗങ്ങളില്‍ സാരി ഉടുക്കുന്ന രീതിയെക്കുറിച്ച് ചില സ്കെച്ചുകളും കുറിപ്പുകളുമാണിവിടെ പോസ്റ്റുന്നത്.
തമിഴ് സ്ടൈലില്‍ തുടങ്ങാം.

അയ്യങ്കാര്‍ (വിഷ്ണുഭക്തര്‍)സ്തീകളുടെ രീതി

വളരെ സങ്കീര്‍ണമായ ഒരു രീതിയാണ്. വിശേഷാവസരങ്ങളില്‍ മാത്രമേ ഇപ്പോള്‍ കണ്ടുവരാറുള്ളൂ.

അയ്യര്‍(ശിവ ഭക്തര്‍)സ്തീകളുടെ രീതി.

അയ്യങ്കാര്‍ സ്ത്രീകളെപ്പോലെ 9യാര്‍ഡോളം വരുന്ന നീളം കൂടിയ സാരിയാണ് ഉപയോഗിക്കുന്നത്. സാദാ സാരിക്ക് നീളം 6യാര്‍ഡ്.

ബംഗാളി സ്റ്റൈല്‍,

എറ്റവും ലളിതമായ രീതിയാണ്, പ്ലീറ്റുകള്‍ ഇല്ലാതെ ധരിക്കുന്നു എന്നതാണ് പ്രധാന സവിശേഷത, സാരിയുടെ അറ്റത്ത് മിക്കവാറും ഒരു താക്കോല്‍ക്കൂട്ടവും കാണും.

ഗുജറാത്തി സ്റ്റൈല്‍,

പല്ലു,(ചിത്രപ്പണികളുള്ള ബോര്‍ഡര്‍ ഭാഗം)തോളിന്റെ വലതുഭാഗത്തുകൂടെ മുന്നിലേക്ക് എടുത്തു ചുറ്റുന്നു. (മലയാളികള്‍ ഇടതു ഭാഗത്താണ് പല്ലു ഇടാറ്)

കൂര്‍ഗ് അഥവാ കുടക് സ്റ്റൈല്‍,

പ്ലീറ്റുകള്‍ പുറകില്‍ വരുന്ന തരത്തില്‍ വളരെ പ്രൌഡി തോന്നിപ്പിക്കുന്ന ഒരു വസ്ത്രധാരണ രീതിയാണിത്.

മഹാരാഷ്ട്രീയന്‍ സ്റ്റൈല്‍

ഇവരും നീളം കൂടിയ സാരികളാണ് ഉപയോഗിക്കാറ്, ഒരുതരം അയഞ്ഞരീതിയിലുള്ള ട്രൌസര്‍ പോലെ ധരിക്കുന്നതിനാല്‍ നോ ട്രബിള്‍സ് ആന്റ് വെരി കംഫര്‍ട്ടബിള്‍! വര്‍ണനെയ്ത്തുകളുള്ള പല്ലു തോളിന്റെ വലതുഭാഗത്തു കൂടെ മുന്നിലേക്ക്. പ്ലീറ്റുകളും മുന്നില്‍ തന്നെ.

സാരികഥകള്‍ പറഞ്ഞാല്‍ തീരില്ല, മുണ്ടും വേഷ്ടിയുമടക്കം (ഇപ്പോള്‍ മലയാളി വനിതകളുടെ ദേശീയ വസ്ത്രം മാക്സിയാണല്ലോ!) പല നാട്ടുകാരുടെയും സാരിപുരാണം ഇനിയുമുണ്ട് കുറേ,വഴിയെ പറയാം.
...
മറ്റുചില സാരി പോസ്റ്റുകള്‍

...
സാരിയെക്കുറിച്ച് എന്റെ വിനീത അഭിപ്രായം
സാരിയും കഥയും അല്പം രാഷ്ട്രീയവും
സിസ്റ്റര്‍ അന്ന ബാരറ്റിന്റെ സാരി
സാരി- ഒരു നേര്‍വായന

ഞാന്‍ കണ്ട ഇന്ത്യ 3: രേഖാചിത്രങ്ങള്‍

2007-10-17T23:52:00.000-07:00

....പാബുജീ കാ ഫഡ് ...

നമ്മുടെ പുള്ളുവന്‍ പാട്ടു കേട്ടിട്ടില്ലേ?? അതിന്റെ രാജസ്ഥാനി വെര്‍ഷനെക്കുറിച്ചെഴുതാം ഇക്കുറി. ‘പാബുജീ കാ ഫഡ് ‘ എന്നുപറയും. എന്നുപറഞ്ഞാല്‍ പാബുജിയുടെ ഫടം, പടം തന്നെ!! രാജസ്ഥാനിലെ ഭോപാ വര്‍ഗക്കാരുടെ(മാര്‍വാര്‍ പ്രദേശക്കാര്‍), ഒരു കലാരൂപമാണിത് . രജപുത്രരുടെ വീരകഥകള്‍ 30അടി നീളവും 5 അടി വീതിയുമുള്ള ഒരു തുണിയില്‍ വരച്ച് ആ കഥകള്‍ നാടോടി പാട്ടിലൂടെ വിവരിക്കുകയാണ് പതിവ്. ചിരട്ടയും മുളയും കൊണ്ട് നിര്‍മിച്ച ‘രാവനഹട്ട’ എന്നു വിളിക്കുന്ന ഒരു സംഗീത ഉപകരണവുമുണ്ടാവും. 700 വര്‍ഷത്തോളം പഴക്കമുള്ള ഒരു ഓഡിയോ വിഷ്വല്‍ ഷോ!!

ഖാദിയിലോ കാന്‍വാസിലോ ആണ് പടം വരക്കുന്നത്. ആദ്യത്തെ വര ചിത്രകാരന്റെ കുടുംബത്തിലെ കന്യകയുടെ വക. (ബ്ലോഗര്‍ ചിത്രകാരനല്ല ഇത് പടം വരപ്പുകാരന്‍!!) ആദ്യകാലങ്ങളില്‍ വെജിറ്റബിള്‍ കളറുകള്‍ മാത്രമാണുപയോഗിച്ചിരുന്നതെങ്കില്‍ ഇപ്പൊള്‍ കൃത്രിമനിറങ്ങളും ഉപയോഗിക്കുന്നു. (ഡിജിറ്റല്‍ പ്രിന്റിങ്ങിനെക്കുറിച്ച് ഇവര്‍ക്കറിയാത്തത് ഭാഗ്യം)

പണ്ടു കാലങ്ങളില്‍ ഉപയോഗിച്ച് പഴക്കം വന്ന ചിത്രങ്ങള്‍ പുഷ്കര്‍ തടാകത്തില്‍ മുക്കുമായിരുന്നു. ഇപ്പോള്‍ ഇത് സായിപ്പന്മാര്‍ക്കു വില്‍കുന്നു.10,000 രുപയോളം നല്കാന്‍ സായിപ്പു റെഡി. അതിനാല്‍ ഒരു തട്ടിപ്പുകച്ചവടമായിട്ടുണ്ട് ഇത്. നമ്മുടെ നാട്ടിലെ ആയുര്‍വേദ കച്ചവടം പോലെ..

വലുതായിക്കാണാന്‍ സ്ക്ചെച്ചുകളില്‍ ക്ലിക്കൂ!!

ഞാന്‍ കണ്ട ഇന്ത്യ-2: രേഖാചിത്രങ്ങള്‍

2007-10-16T22:49:00.000-07:00

ഇത് ഗുജറാത്തിലെ റബാരി വര്‍ഗക്കാരുടെ സ്കെച്ചുകള്‍,2002ല്‍ വരച്ചത്. മുന്‍ കാലങ്ങളില്‍ നോമാഡുകളായിരുന്നെങ്കിലും ഇപ്പോള്‍ സെമി-നോമാഡുകള്‍ എന്നറിയപ്പെടുന്നു. ഞാന്‍ ശ്രദ്ധിച്ച ഇവരുടെ ഏറ്റവും വലിയ സവിശേഷത സ്തീകള്‍ക്ക് പുരുഷന്മാര്‍ക്കു മുകളില്‍ ലഭിക്കുന്ന ബഹുമാന്യതയാണ്. സ്തീധനത്തിനു പകരം പുരുഷധനമാണ് ഇവര്‍ക്കിടയില്‍ നിലനില്‍ക്കുന്നത്. കച്ച്,ഭുജ് പ്രദേശ വാസികളായ ഇവരുടെ വിവാഹങ്ങളെല്ലാം വര്‍ഷത്തിലൊരിക്കല്‍ ഒരേ ദിവസം നടക്കുന്നു. പ്രധാന പണി ഒട്ടകവും ആടും പോറ്റലാണ്.

സ്ത്രീകള്‍ പ്രധാനമായും കറുത്തതും നിറയെ ചിത്രത്തുന്നലുകളുള്ള വസ്ത്രങ്ങളും സവിശേഷമായ ആഭരണങ്ങളും ആണ് ധരിക്കുക. വസ്ത്രങ്ങളിലെ അലങ്കാരതുന്നലുകള്‍ സ്ത്രീകള്‍ സ്വയം ചെയ്യുന്നു. അസഹ്യമായ ചൂടില്‍ കറുത്ത വസ്ത്രംധരിക്കുന്നതിന്റെ ലോജിക് എനിക്കു മനസ്സിലായിട്ടില്ല.

സ്ഠീകളുടെത് കറുത്തതെങ്കില്‍ പുരുഷന്മാരുടെത് വെളുത്ത നിറത്തിലുള്ള വസ്ത്രമാണ്.കൊമ്പന്‍ മീശ പുരുഷാഭിമാനത്തിന്റെ അടയാളവും.
സ്കെച്ചുകളില്‍ ക്ലിക്കിയാല്‍ വലുതായിക്കാണാം

ഇതു കൂടെ ചേര്‍ത്തു വായിക്കുക

ഞാന്‍ കണ്ട ഇന്ത്യ: രേഖാചിത്രങ്ങള്‍

2007-10-10T21:35:00.001-07:00

ഇന്ത്യയില്‍ ഇങ്ങനെയും ചില സ്ഥലങ്ങള്‍, ചില മനുഷ്യര്‍.. ഏകദേശം പത്തു വര്‍ഷം മുമ്പ്, കോളേജ് പഠനത്തിന്റെ ഭാഗമായി , സിക്കിമിന്റെ വടക്കേയറ്റത്തുള്ള ലാച്ചുങ്ങ് എന്ന ഒരു കുഗ്രാമത്തില്‍ ഒരു മാസം താമസിക്കേണ്ടിവന്നു. അവരുടെ ജീവിത രീതികളേയും ക്രാഫ്റ്റുകളെയും കുറിച്ച് ഒരു ഡോക്യുമെന്റ് തയ്യാറാക്കലായിരുന്നു ഉദ്ദേശ്യം. ആ താമസത്തിനിടെ വരച്ച ചില സ്കെച്ചുകളാണിവ.

മരവീട്. ശൈത്യകാലത്തെ കോടുംതണുപ്പില്‍ ഇത്തരം വീടുകള്‍ അനിവാര്യം

സ്ത്രീകളുടെ വസ്ട്രധാരണ രീതി. വിവാഹിതകളാണ് ഏപ്രണ്‍ പോലെയുള്ള ഒരുതരം തുണി വയറ്റിനു മുന്‍ഭാഗത്തായി ചുറ്റുന്നത്.

പുരുഷന്മാരുടെ വസ്ത്രധാരണ രീതി.